Canllawiau syml
Bwriedir i’r canllawiau yma ategu’r canllawiau mwy cynhwysfawr ar archwilio yn yr adnodd electronig yma, neu gellir ei ddefnyddio fel canllawiau atgoffa ar gyfer y rhai sydd yn fwy cyfarwydd â’r broses archwilio.
Er bod pob un ohonom yn defnyddio archwiliad yn anffurfiol fel rhan o’n hymarfer, mae dangos dealltwriaeth o’r broses yn rhywbeth y mae meddygon teulu yn ei gael yn anodd. Dylai’r pecyn archwilio yma alluogi meddygon teulu i gwblhau archwiliad ystyrlon a dealladwy. Gellir defnyddio eich archwiliad a gwblheir fel sylfaen ar gyfer myfyrio ar yr hyn ydych yn ei wneud, trafodaeth gyda chydweithwyr a/neu ar gyfer cyflwyno neu adolygu newidiadau yn y practis. Fe’ch anogir i gynnwys yr archwiliad yn eich arfarniad meddyg teulu ynghyd â myfyrio ar yr hyn yr ydych wedi ei ddysgu ohono a beth, os o gwbl, fyddwch yn ei wneud yn wahanol o ganlyniad i hynny.
Sut mae dewis testun ar gyfer archwiliad:
Gall y dewis o destun ar gyfer archwiliad adlewyrchu materion ynghylch llwyth gwaith clinigol, data rhagnodi, canllawiau newydd neu sefydledig neu ddeilliant cwyn neu SEA, er enghraifft rhagnodi mynych DMARD o’i gymharu â protocolau gofal ar y cyd.
Pennwch y meini prawf:
Defnyddio tystiolaeth glinigol, canllawiau lleol neu genedlaethol etc.
Pennwch safonau:
Diffiniwch safon allai fod yn ddelfrydol, yn optimwm neu’n ofynnol.
Dyluniwch yr offeryn archwilio:
Yn aml gyda help staff gweinyddol mewnol, dyluniwch y broses o gasglu gwybodaeth - cofiwch y dylai hynny fod yn gymharol hawdd i’w wneud gyda’ch meddalwedd presennol neu defnyddiwch ddata sydd ar gael yn rhwydd o ffynonellau eraill.
Casglwch y data:
Mae angen pennu amserlen addas ar gyfer casglu data; bydd hynny yn dibynnu ar y testun dan sylw a’r niferoedd fydd eu hangen.
Cymharwch y canlyniadau:
Cymharwch y canlyniadau gyda’r safonau a osodwyd a phenderfynu ar unrhyw newidiadau sydd angen eu gwneud.
Rhowch newidiadau ar waith:
Cymhwyswch y newidiadau ar draws y sefydliad gan sicrhau bod pawb dan sylw yn ymwybodol o beth sydd yn newid a pham.
Ail gasgliad data:
Ar ôl cyfnod addas o amser, casglwch y data eto. Cymharwch y rhain gyda’r safonau a osodwyd a chanlyniadau’r casgliad data cyntaf.
Casgliadau:
Beth a ddysgwyd, a yw’r ymarfer wedi gwella ac wedi symud tuag at y safonau a osodwyd, a oes angen gwneud mwy o newidiadau?
Dylai'r wybodaeth yma eich helpu i gynhyrchu archwiliad cydlynol a gwerthfawr a dylai hynny yn ei dro eich helpu i wella eich ymarfer.